उपवासाची बटाट्याची बर्फी

साहित्यः

• १ कप उकडलेल्या बटाटयाचा लगदा
• अर्धा कप नारळाचे खोबरे
• अर्धा कप दूध
• २ कप साखर
• ७/८ वेलदोडे
• अर्धा चमचा सायट्रिक ॲसीड (लिंबाचे फूल)
• थोडेसे जायफळ
• थोडी जायपत्री
• अर्धी वाटी पिठीसाखर

कृती:

1. पिठीसाखरेखेरीज सर्व पदार्थ एकत्र करून गॅसवर ठेवावे.
2. नंतर जरा घट्टसर झाले की वालाएवढे मिश्रण एका वाटीत पाणी घेऊन त्यात घालून पहावे.
3. विरघळले नाही म्हणजे उतरावे व डावेने घोटावे.
4. जरा वेळ घोटल्यानंतर मग त्यात पिठीसाखर घालून पुन्हा घोटावे व ओलसर आहे तोच तूप लावलेल्या ट्रे किंवा थाळीत मिश्रण ओतून हाताला तूप लावून थापावे.
5. वरील प्रमाणाच्या बर्फीसारख्या जाड २४ वडया होतात व अगदी खाण्याच्या बर्फीप्रमाणे बर्फी चवीला सुंदर लागते.
6. जायफळ व जायपत्रीचा वास फार सुंदर येतो.
7. त्यामुळे बटाटयाचा उग्रपणा कमी होतो.
8. नंतर वडया कापून प्रत्येक वडीच्या मध्यभागी एकेक चारोळी बसवावी.

ही बर्फी उपवासाला चालते.

– सौ. मंगला बर्वे | कालनिर्णय ऑगस्ट १९७५